Биринчи ракеткамиз Хитой турнири 1/2 финалига чиқди

Ўзбекистоннинг биринчи ракеткаси Сергей Фомин ҳозиргина якунига етган 1/4 финал учрашувида яна бир муҳим ғалабани қўлга киритди. Ҳамюртимиз 104 дақиқа давом этган баҳсда ATP рейтингида 369-поғонада бораётган кореялик Шин Сан Хюни уч сет натижасига кўра мағлубиятга учратди - 6/3, 5/7, 6/3. 

Таққослаш учун, Фомин айни пайтда дунёнинг 383-ракеткаси бўлиб турибди. Икки теннисчи учрашувида 23 та эйс зарбаси амалга оширилди. Сергей 10, Шин 13 та эйс зарбасига муаллифлик қилди. Қўшхатолар кореялик теннисчида кўпроқ бўлди - 3 га 1. Бу теннисчиларнинг ўзаро ўтказган илк учрашуви эди. 

Энди Сергей Фомин финал чиптаси учун хитойлик Сун Фажингга қарши кортга чиқади. Ушбу учрашув эртага бизнинг вақт билан соат 07:00да бошланади. Турнирда учинчи рақам остида таснифланган Сун 1/8 финалда мамлакатимизнинг иккинчи ракеткаси Ҳумоюн Султоновни таслим этган эди.