Бокс бўйича жаҳон чемпионати Тошкентда бўлиши мумкин

Анжуман чоғида мартабали меҳмонга Ўзбекистон бокс федерацияси раис ўринбосари Шерзод Тошматов ҳамроҳлик қилди. Ш.Тошматов кеча AIBA томонидан бир овоздан ушбу ташкилотнинг Ижроқўм аъзолигига сайланганди.
Матбуот анжуманида спорт йўналишида фаолият юритаётган ҳамкасбларимиз ўзларини қизиқтирган саволларга жавоб олишди.

Чинг-Куо Ву саволларга жавоб қайтарар экан, мамлакатимизда спортга, хусусан боксга қаратилаётган эътибор ҳамда унинг самараси ўлароқ халқаро мусобақаларда қўлга киритилаётган улкан ғалабаларга алоҳида тўхталди.
Шунингдек, AIBA президенти ташкилотнинг ижроия қўмитасига юқори савияда мезбонлик қилган юртимиз спорти мутасаддилари, бокс федерацияси раҳбариятига ўз миннатдорчилигини билдирди.
Чинг-Куо Ву ўз сўзида давом этар экан, Ўзбекистон бокси бугунгидек юқори тезликда ўсишда давом этса, бемалол катталар ўртасидаги жаҳон чемпионати мезбонлигига даъвогарлик қилиши мумкинлигини айтди. Вунинг фикрича, шундай бўлган тақдирда, пойтахтимиз ушбу катта спорт анжуманини ҳам жаҳон талаблари даражасида бемалол ўтказа олишига урғу қаратди.

Эслатиб ўтамиз, кеча Чинг-Куо Ву Оқсарой қароргоҳида Ўзбекистон Республикаси Президенти Ислом Каримов қабулида бўлганди. Учрашувда дунё бокс ташкилоти раҳбари Ўзбекистон Республикаси Президентига спорт ва олимпия ҳаракатини ривожлантириш ҳамда оммаллаштириш йўлидаги улкан хизматлари учун, шунингдек, боксни халқаро ва миллий даражада ривожлантириш борасидаги фидокорона меҳнати эътирофи сифатида АIBАнинг юксак мукофоти – “Хизматлари учун” орденини топширган эди.