Болалар спорти. Чироқчидаги боғчада курашга ошно болалар

Айниқса, боғча ва мактаб ёшидаги ўғил-қизларимизни спортга қизиқтириш ва саломатликларини мустаҳкамлаш, истеъдодларини рўёбга чиқариш ўта муҳим. 

Бу борадаги ишларга мактабгача таълим муассасаларида ҳам алоҳида эътибор қаратилган. Хусусан, Чироқчи туманидаги “HELLO HAPPY KIDS” давлат хусусий шерикчилик асосидаги нодавлат мактабгача таълим муассасасида тарбияланаётган 130 нафар ўғил-қизларнинг спортга ошно бўлишлари ва таълим – тарбия олишлари учун  барча шарт-шароитлар муҳайё этилган. Бу масканда жараёнлар энг аввало давлатимиз мадҳияси янграшдан ва   эрталабки бадантарбия машғулотларидан бошланади.  

Тадбиркор Фарҳод Жуманов томонидан ташкил этилган мазкур болалар боғчасида Президентимиз томонидан таъсис этилган 5 та муҳим ташаббуснинг ижроси таъминланаётганига гувоҳ бўлишингиз мумкин. Жумладан , расм чизиш, рақс, китобхонлик, китобхонлик доирасида аудио ўқитиш, инглиз, рус тилларини  ўрганиш, шахмат – шашка, футбол каби бир қатор тўгараклар йўлга қўйилган. Яқинда тадбиркор Ф. Жуманов боғчада яна бир хайрли ишга қўл урди. Жажжи фарзандлар  миллий курашимиз билан шуғулланишлари учун  кураш спорт тури бўйича тўгаракни йўлга қўйди. Ҳозирда мураббийи Умиджон Самадов қўл остида  25 нафар болажонлар кураш сирларни ўрганишни бошлашди. Қизиқ ҳолат –  “HELLO HAPPY KIDS” нинг машғулот майдончасида эгнига илк бор кураш кийимини кийиб,  илк бор кураш тушаётган  4-5 ёшли болалар худдики катта полвонлар сингари ҳаракат қилиб, тезда усулга киргани ва рақибини “елка”  ёки “қўшша” қилаётганини кўриб, ҳайрон ёқангизни ушлайсиз ва  полвонлик ўзбекнинг қонида борлигига яна бир амин бўласиз.

Илҳом РАҲМОНОВ тайёрлади