Болалар спорти. Спортга ошно қамашилик болалар

Қашқадарё вилояти Туризм ва спорт бош бошқармаси тасарруфидаги Қамаши туман 2-сонли болалар-ўсмирлар спорт мактабида тарбияланаётган спортчи-ўқувчилар ҳам чемпион бўлиш умидида маррани юқори олиб, тайёргарликларга зўр беришган.

Қамаши туманидаги мазкур 2-сонли болалар-ўсмирлар спорт мактабида айни пайтда 1075 нафар ўғил-қизлар 26 нафар малакали мураббийлар қўл остида спортнинг 16 та тури бўйича мунтазам ўқув-машғулотларида иштирок этиб, маҳоратларини ошириб боришмоқда.  

Машғулотларда тобланаётган ёш спортчиларнинг  мусобақларда қўлга киритаётган натижалари ҳам мақтовга лойиқ, дейиш мумкин. БЎСМда биргина жорий йилда кўплаб вилоят ва республика чемпион ва совриндорлари тайёрланган.

Жумладан, спортнинг қўл жанги тури буйича Навоий вилоятида 17-20 июль кунлари бўлиб ўтган Ўзбекистон кубогида Севинч Тошпўлатова 60.кг вазнда фахрли 2-ўринни, Лочинбек Улашмуродов эса 3-ўринни қўлга киритган. 7-10 июль кунлари Тошкент шахрида таеквондо WТ спорт тури бўйича 2010-2013 йилларда туғилган ўсмирлар ўртасидаги мамлакат чемпионатида Хожиакбар Тошмуродов кучли учликдан жой олишга муваффақ бўлган. 

Анъанавий ушу буйича 26-27 июнь кунлари Фарғона вилоятида бўлиб ўтган Ўзбекистон кубогида Абсалом Чориев  51кг. вазнда 1-ўринни, Мусулмон Баҳромжонов 51 кг.да 2-ўринни, Руслан Саимов 48 кг. вазнда 3-ўринни, Қувончбек Дўсқобилов 48кг. вазнда 1-ўринни, Оғабек Юлдошев 45 кг. вазнда 2-ўринни қўлга киритган.

Шунингдек, ўтган ойнинг 7-8 октябрь кунлари спортнинг таеквондо WТ тури буйича Сурхондарё вилоятида бўлиб ўтган “SURXON OPEN” турнирида Элшодбек Раҳматов  мураббийлигидаги БЎСМ терма жамоасидан Расулбек Ўктамов 3-ўрин, Хумоюн Файзуллаев 2-ўрин, Асадбек Абдуллаев 1-ўриннларни эгаллашга муваффақ бўлишган.

Спортнинг бадиий гимнастика тури буйича шуғулланаётган қизалоқларнинг мусобақалардаги натижаларини ҳам таҳсинга сазовор, дейиш мумкин. Мисол учун бадиий гимнастика мураббийи Шаҳноза Ҳайиталиева қўл остида шуғулланаётган қизлар 9-10 октябрь кунлари Навоий вилоятининг Навбаҳор туманида ўтган Республика очиқ биринчилигида иштирок этиб, 4 та олтин, 3 та кумуш медалларни жамғаришган. 

13 октябрь куни  кураш буйича бўлиб ўтган вилоят чемпионатида олти нафар БЎСМ терма жамоа аъзолари ўз вазн тоифаларида совриндорлар қаторидан жой олиб, Ўзбекистон чемпионатида иштирок этиш йўлланмасини нақд қилишган. Бундай ютуқли натижаларни яна кўплаб келтириш мумкин.

Албатта, ёш спортчиларнинг юқори натижаларга эришишида  БЎСМ директори Шербек  Соатов бошчилигида Нормаҳмат Жалилов (услубчи, кураш ва самбо бўйича халқаро тоифадаги спорт устаси ), Азизбек Барноев (муайтай), Файзулла Муртозоев (таэквондо WТ), Шахноза Ҳайиталиева (бадиий гимнастика), Ғиёсиддин Турсунов (бокс), Элбек Мустанов  (футбол) каби тажрибали устоз-мураббийлар меҳнатининг самараси, дейиш мумкин.

БЎСМ директори Шербек Соатовнинг таъкидлашича,  мавжуд спорт турлари бўйича машғулотлар БЎСМ филиалларида, туманнинг турли ҳудудларидаги таълим муассасаларининг спорт залларида ҳамда 2020 йилда бунёд этилган спорт мажмуасида олиб борилади. БЎСМдаги янгидан қурилган очиқ ва ёпиқ спорт мажмуасида бир пайтнинг ўзида футбол, волейбол, баскетбол, енгил атлетика, оғир атлетика, таэквондо WТ, бадиий гимнастика, шахмат, шашка, бокс, кураш каби спорт турлари бўйича машғулотлар ўтказиш имконияти яратилган. 

Бир сўз билан айтганда, спорт учун шарт-шароитлар етарлича бўлган майдонларда иродаси мустаҳкам болажонлар шиддату шаҳд билан ўзлари танлаган спорт турлари бўйича машғулотларга зўр беришган. Чунки улар спортга ошно болажонлар-да.      

Илҳом РАҲМОНОВ тайёрлади