Бу қизиқ! 29 бор Гиннес рекордлар китобига киритилган ўзбек полвони ҳақида эшитганмисиз?

У туғилганида 6 килограму 200 грамм бўлган экан. 12 ёшида акаси – "Ўзбек йўлбарси" деб ном қозонган Баҳром Ахназаров изидан бориб, цирк санъатига қадам қўйган.

"Гиннес рекордларига киришим шундай бошланган эди. Тинч океани минтақасидаги давлатлар бўйлаб гастролга чиқдик. Майкл (гуруҳ раҳбари) жуда ҳавотирланди. Чунки чипталаримиз қиммат эди. Шунда мен Майклга бир таклиф бердим: "Чиқишларимиздан бир ой олдин рекламамиз учун йўловчи самолётни маълум масофагача тортиб бораман. Ҳали бу трюкни дунёнинг ҳеч бир полвони бажарган эмас. Газеталар бу ҳақида ёзади ва биз бепул реклама уюштирамиз", – дедим. Майкл ишониб-ишонмай таклифимга рози бўлди. Мен шу тариқа Гонконгда биринчи рекордимни ўрнатдим.

Рекордларим орасида Бирлашган Араб Амирликларида кўрсатган трюкимдан ўзим ҳам фахрланаман. Ўшанда ҳар бири 7 тонна келадиган АҚШ ҳарбий юк машиналарини тишимда тортган эдим", – дейди Фахриддин Ахназаров Россиянинг "Факт" сайтига берган интервьюсида.

29 марта Гиннес рекордлари китобига киритилган Фахриддин қўлларининг кафти билан тахтага юзлаб михни қоқади, тишида 150 килограмлик юкни бемалол кўтаради, 16 йўловчиси бор автомобилни бир қўли билан ҳеч бир қийинчиликсиз маълум масофагача тортиб бора олади.

Болаликдаги кумири – Голливуднинг машҳур актёрларидан бири Арнольд Шварцнеггернинг Фахриддин Ахназаров чиқишларини кўриш учун фарзандлари билан бирга томошага келиши, шунингдек, АҚШнинг 42-президенти Билл Клинтон, Англия қироличаси Элизавета II ларнинг ўзбек полвони шоу-дастурига ташриф буюриши, "Оскар" тақдимотида чиқиш қилгани, жаҳон кино санъати намоёндаси Жеки Чаннинг бирга фильмга тушиш таклифини билдириши...

Бу каби муваффақиятлар донғи дунёга таралган полвонни асло ҳаволантирмаган. У ҳамон ўзини дунё миқёсида тасаввурга сиғмас натижаларга эришган музаффар инсон эмас, фарзандлари учун жонкуяр ота, рафиқаси учун вафодор умр йўлдош, уни тарбиялаб вояга этказган ота-онасининг юзини эрга қаратмаган қобил фарзанд деб билади. Оиланинг катта фарзанди Баҳром Ахназаров билан бошланган полвонлар сулоласининг цирк санъатидаги фаолиятини Қаҳрамон, Озод, Наврўз, Камол, Мўминжон, Шоҳрух ва Улуғбек Ахназаровлар давом эттирмоқда.

Ҳар даврнинг ўз қаҳрамони, ҳар давранинг ўз лидери бўлади. Ўзбек мумтоз спорт турини жаҳон цирк аренасига олиб чиқиб, миллатлараро танитган, замонавий цирк шоулари билан уйғунлаштира олган Ахназаровлар том маънода миллатимиз шарафидир.

Ҳабиб Жўрабоев тайёрлади