Бугун Тошкентда проф кикбокс бўйича турнир ўтказилади + ФОТОГАЛЕРЕЯ

Дастлабки икки кун ҳаваскорлар ўртасидаги бир-биридан қизиқарли жанглар ташкил этилди. Бугун эса аввалига ҳаваскорлар ўртасидаги ушбу жангларнинг финал беллашувлари ўтказилади, кейин эса профессионалларга навбат берилади. 

Кеча кечқурун бугунги проф кикбокс жанглари олдидан "International" меҳмонхонасида расмий тарозидан ўтиш ва кўз уриштириш маросими ҳамда оммавий ахборот воситалари ходимлари учун матбуот анжумани ўтказилди. Барча тўрт жуфтлик жангчилари белгиланган вазн меъёрини бажаришди. Биргина Темурбек Холматовнинг мисрлик рақиби Абдуллоҳ Мандо Тошкентга белгиланган вақтда етиб кела олмади. Рейсдаги кечикиш сабаб у кеча ярим тунда пойтахтимизга етиб келган. 

Бугунги проф жанг жуфтликлари:

Гулжаҳон Норматова (Ўзбекистон) - Мария Белкина (Украина)  

Темурбек Холматов (Ўзбекистон) - Абдуллоҳ Мандо (Миср)

Ҳусанхон Баратов (Ўзбекистон) - Меҳмет Ўзер (Туркия)

Муродбек Азимов (Ўзбекистон) - Иван Бертич (Хорватия)

Матбуот анжуманида Ўзбекистон Кикбоксинг федерацияси раиси Ойбек Нарметов WAKO ташкилоти билан ҳамкорликда ўтказилаётган ушбу халқаро турнирнинг ташкилий жиҳатларига атрофлича тўхталиб ўтди. Жангчилар эса фақат ғалаба учун рингга чиқишларини маълум қилишди.

Маълумот учун, бугунги профессионал кикбоксинг оқшоми пойтахтимиздаги "Юнусобод" спорт мажмуасида соат 18:00да бошланади.