Бухорода “Автомобилсиз кун” шиори остида оммавий юриш марафони бўлиб ўтди

Бугун, 4 сентябрь куни Бухоро шаҳрида вилоят ҳокимлиги, вилоят жисмоний тарбия ва спорт бошқармаси ва вилоят ИИБ ЙҲХБ ташаббуси билан мутасадди раҳбарлар ва аҳоли иштирокида пиёда юриш марафони ўтказилди.

Мазкур марафон “Автомобилсиз кун” шиори остида, соғлом турмуш тарзини қўллаб қувватлаш ва аҳолини жисмоний фаоллигини ошириш мақсадида ўтказилди. Бунда икки мингдан зиёд ахоли бевосита иштирок этди. Жумладан, вилоятдаги корхона, ташкилот, таълим муассасалари ходимлари ҳамда аҳолининг барча қатлами вакиллари спортнинг оммалашуви йўлида ибрат кўрсатишди.

Пиёда юриш инсон танаси учун энг табиий жисмоний жараён ҳисобланади. Лекин, кўпчилигимиз аксарият ҳолларда иш билан бирор манзилга йўл олар эканмиз доимо автоуловлардан фойдаланишга ўрганиб қолганмиз.

Мунтазам равишда пиёда юриш юрак-қон томир касалликлари хавфини олдини олади ва танадаги ортиқча калорияни йўқотишда ёрдам беради.

Шундай экан, ҳаётингизнинг бирламчи муҳим омили бўлган соғлигингизга вақтида эътибор қаратинг ва кунингизнинг маълум бир вақтини оилангиз ёки дўстларингиз билан пиёда юриш билан ўтказинг.