Бухорода мактаб ўқувчилари ўртасида волейбол мусобақаси ўтказилди

Бухоро вилояти Пешку туманидаги болалар ва ўсмирлар спорт мактабида “Соғлом танда – соғ ақл” шиори остида ташкил этилган турнирда вилоят, шаҳар ва туманлардаги умумтаълим мактабларининг 200 нафарга яқин спортсевар қизлари иштирок этди. Мусобақа юқори савияда, муросасиз баҳсларга бой бўлди.

Турнирда иштирокчилар ёш тоифасига қараб икки гуруҳга бўлинган ҳолда ғолиблик учун баҳс олиб борди.

Якуний натижаларга кўра қуйи гуруҳда Когон тумани жамоаси фахрли 3-ўринни қўлга киритган бўлса, Қоракўл тумани жамоаси шоҳсупанинг иккинчи поғонасини банд этди. Бу жамоа ёш волейболчилари ҳал қилувчи ўйинда Олот туманидан келган тенгдошларига имкониятни бой берди.

Юқори синф ўқувчи қизлари ўртасидаги қизғин баҳлардан сўнг финал ўйинига мезбон – Пешку ҳамда Бухоро шаҳри жамоалари етиб келишди. Унда Бухоро шаҳри жамоаси ғалаба қозонди. 3-ўрин Шофиркон тумани волейболчи қизларига насиб этди.

Мусобақа якунида ғолиб жамоалар ташкилотчилар томонидан диплом ва эсдалик совғалари билан тақдирланишди.