Вирал сурат ортидаги Мерьем: Туркия волейболининг 20 ёшли гўзали бутун дунёни ўзига қаратмоқда

3 октябрь куни "Bodrum Belediyesi Bodrumspor"нинг "Karşıyaka"га қарши ўйини олдидан жойланган оддий сурат эса вазиятни ўзгартириб юборди.

20 ёшли волейболчининг жамоа либосидаги сурати аввал Туркиядаги, кейин эса хориждаги ижтимоий тармоқ саҳифаларида кенг тарқалди. Жаббароғлу кейинчалик бу қадар катта қизиқишни умуман кутмаганини айтди. Энг қизиғи, суратни жойлаган пайтда у дўсти билан товуқли палов еб ўтирганини эслаган.

Аммо Мерьем ҳақидаги воқеа фақат вирал сурат* билан тугамайди. Ижтимоий тармоқлар уни бир неча кунда танитган бўлса-да, волейболдаги йўли анча олдин бошланган.

Мерьем Жаббароғлу ким?

Мерьем Жаббароғлу 2006 йил 14 февралда туғилган. У 20 ёшда, бўйи 163 сантиметр ва волейболда либеро позициясида ўйнайди. 2026/27 йилги мавсумда у Туркия Аёллар волейбол 1-лигасининг А гуруҳида қатнашаётган "Bodrum Belediyesi Bodrumspor" шарафини ҳимоя қилмоқда.

Либеро одатда жамоанинг кўп ҳам кўзга ташланмайдиган ҳужумчиси. У очколарни кучли зарбалар ёки блоклар билан йиғмайди. Унинг асосий вазифаси — рақиб сервисларини қабул қилиш, ҳимояда мураккаб тўпларни сақлаб қолиш ва жамоанинг кейинги ҳужумини бошлаш учун имконият яратиш.

Шу маънода либеро — майдондаги энг кам "шовқинли", аммо жамоа тизими учун энг муҳим позициялардан бири.

Мерьемнинг 163 сантиметрлик бўйи ҳам айнан шу амплуа учун ноодатий эмас. CEVнинг расмий базасида унинг 2021 йилдаги U16 терма жамоаси қайдномасида ҳам позицияси либеро сифатида кўрсатилган.

Волейбол йўли Анқара билан бошланган

Жаббароғлу ўзининг волейбол фаолияти Анқарада бошланганини айтади. Унинг илк муҳим босқичларидан бири Туркия Волейбол федерациясининг ёшлар тизимидаги TVF Spor Lisesi бўлган.

Очиқ спорт базаларидаги маълумотларга кўра, кейинчалик у "MKE Ankaragücü", "Alpet Zeren Spor" ва "Zeren Spor" U18 таркибларида ҳам ўйнаган. 2026 йил ёзида эса "Bodrum Belediyesi Bodrumspor" янги мавсум учун Жаббароғлу билан шартнома тузганини эълон қилди.

Бодрум клуби янги мавсум олдидан жамоани ёш волейболчилар асосида қайта шакллантирди. Мерьем ҳам шу лойиҳанинг янги трансферларидан бири бўлди. Бош мураббий Аднан Кистак бошчилигидаги таркиб Туркия Аёллар 1-лигасида қатнашмоқда. 

15 ёшидаёқ Туркия терма жамоаси тизимида

Мерьемнинг фаолиятидаги муҳим деталлардан бири — у ижтимоий тармоқларда танилишидан анча аввал ёшлар терма жамоаси тизимига кириб улгурган.

Европа волейбол конфедерацияси — CEVнинг расмий маълумотларида Жаббароғлу 2021 йилги U16 қизлар ўртасидаги Европа чемпионати учун Туркия таркибида қайд этилган. Ўша пайтда у 15 ёшда эди. CEV уни 163 сантиметр бўйли либеро сифатида кўрсатади.

Бу маълумот унинг машҳурлиги фақат сўнгги ҳафталардаги ижтимоий тармоқ феномени эмаслигини кўрсатади: Жаббароғлу ўсмирлик давридаёқ Туркиянинг ёшлар терма жамоаси селекциясига кирган.

Бир сурат ва кутилмаган машҳурлик

2026 йил 3 октябрда "Bodrumspor" "Karşıyaka"га қарши мавсумдаги дастлабки ўйинларидан бирига тайёрланаётган эди. Мерьем жамоа формасидаги суратини ижтимоий тармоқдаги саҳифасига жойлади.

Кейин эса воқеа унинг назоратидан чиқиб кетди.

Сурат турли саҳифаларда қайта жойлана бошлади. У ҳақидаги қидирувлар кўпайди, Туркия ОАВлари кетма-кет "Мерьем Жаббароғлу ким?" деган материалларни эълон қилди.

Мерьемнинг ўзи эса бунга анча эҳтиёткор муносабат билдирди. У ижобий ва салбий изоҳларни кўп ўқимасликка ҳаракат қилаётганини айтди.

"Бундай нарсани кутмагандим, ҳайрон қолдим. Ижтимоий тармоқларда ҳамма нарса бирдан тарқалиб кетиши мумкин", — деди у DHAга берган интервьюсида.

Қизиқ томони шундаки, жамоатчилик уни бирдан ташқи кўриниши орқали кашф этган бир пайтда, Жаббароғлунинг ўзи суҳбатларда эътиборни спортга қайтаришга ҳаракат қилмоқда.

Онаси россиялик, отаси Ёзгатдан

Вирал суратдан кейин Мерьемнинг келиб чиқиши ҳақида ҳам кўплаб тахминлар тарқалди. У бу саволга ўзи аниқлик киритди.

Жаббароғлунинг айтишича, онаси россиялик, отаси эса Туркиянинг Ёзгат вилоятидан. Ўзи Анқарада туғилиб ўсган ва ўзини анқаралик деб ҳисоблайди.

Шу боис интернетдаги унинг қаерлик экани ҳақидаги турли версиялар ўрнига спортчининг ўз баёнотига таяниш тўғрироқ.

Энг катта мақсад — "Filenin Sultanları"

Бирдан келган машҳурликка қарамай, Мерьем ҳозирча узоқ муддатли катта ваъдалар беришни истамайди.

У аввало "Bodrumspor" билан жароҳатларсиз ва яхши мавсум ўтказишни, кейин эса фаолиятида босқичма-босқич олдинга юришни мақсад қилган.

Аммо унинг катта орзуларидан бири аниқ — Туркиянинг А миллий аёллар волейбол терма жамоаси формасини кийиш.

Жаббароғлу Туркия аёллар терма жамоаси ўйинчиларини ўзи учун намуна деб атаган. Унинг фикрича, турли спорт турларида халқаро муваффақиятларга эришаётган туркиялик аёллар ёш қизларга ўз имкониятларини кенгроқ кўришга ёрдам беради.

Бу мақсадга эришиш осон эмас. Туркия аёллар волейболи сўнгги йилларда дунёдаги энг кучли ва рақобат юқори тизимлардан бирига айланди. Айниқса, миллий терма жамоага кириш учун ички чемпионатда барқарор ўйин ва юқори савиядаги ҳимоя кўрсаткичлари талаб қилинади.

Жаббароғлу эса ҳозирча йўлнинг бошида.

Вирал машҳурлик спорт фаолиятига айлана оладими?

Мерьем Жаббароғлунинг ҳикоясидаги энг қизиқ жиҳат ҳам шу.

Ижтимоий тармоқ бир неча кун ичида унга профессионал фаолиятининг шу пайтгача бермаган даражасида танилиш олиб келди. Аммо волейболдаги кейинги босқични Instagram алгоритмлари эмас, унинг майдондаги ўйини белгилайди.

У 15 ёшида Туркиянинг U16 тизимига кирган, турли клубларда тажриба йиғган ва ҳозир 20 ёшида Биринчи лигада ўйнамоқда. "Bodrumspor" эса унинг катта волейбол сари навбатдаги бекатларидан бири. 

Шунинг учун Мерьем Жаббароғлу ҳақидаги энг қизиқ савол "нега бирдан машҳур бўлди?" эмас. Асосий савол — бу машҳурликдан кейин у қандай волейболчига айланади?

Агар у ўзи айтганидек, қадам-бақадам ривожланиб борса, бир неча йил ўтиб Мерьем ҳақида вирал сурати сабаб эмас, балки терма жамоадаги ўйини сабаб ёзиш имконияти ҳам пайдо бўлиши мумкин.

*«Вирал сурат» дегани — интернетда тез тарқалиб, кўпчилик кўрадиган, лайк босадиган ва бошқаларга улашадиган сурат дегани.

Instagram’да суратингиз жуда кўп одамларга ёқиб, минглаб одамлар уни кўрса — вирал сурат бўлиши мумкин.

Суратингизни кўпчилик сторисга қўйса ёки бошқаларга юборса — у вирал бўлиши мумкин.

Қисқача: «Вирал» — интернетда тез оммалашган дегани.