Чимкент-Тошкент веломарафони: ғолиблар аниқланди

Ўзбекистон Республикаси Жисмоний тарбия ва спорт вазирлиги, Ўзбекистон ҳамда Қозоғистон велосипед спорти федерациялари ташаббуси билан ташкил этилган мусобақа 2018 йил – Қозоғистонда ”Ўзбекистон йили” ва 2019 йил – Ўзбекистонда ”Қозоғистон йили”, деб эълон қилингани муносабати билан ўтказилди.

Веломарафонда 250 нафар яқин қозоғистонлик ва ўзбекистонлик велосипедчилар Қозоғистоннинг Чимкент шаҳридан Тошкентдаги Қозоғистон элчихонасига қадар бўлган 130 километрлик масофани босиб ўтди. Иштирокчиларга қулайлик яратиш мақсадида улар учун яшил йўлак ташкил этилди.

Мусобақанинг финиш чизиғида маданий дастур ташкил этилиб, ўзбек эстрадаси юлдузлари иштирокида концерт намойиш этилди. 

Марафон ғолибларини тантанали тақдирлаш маросимида Қозоғистоннинг Ўзбекистондаги Фавқулодда ва мухтор элчиси Дархан Сатибалди, Ўзбекистон Республикаси жисмоний тарбия ва спорт вазирининг биринчи ўринбосари Ойбек Қосимов, Тошкент шаҳри ҳокими ўринбосари Дилбар Нажмутдинова сўзга чиқиб, бу тадбир икки давлат ўртасида дўстлик алоқаларининг янада мустаҳкамланишига, соғлом турмуш тарзини оммалаштиришга хизмат қилишини таъкидлаб, бу каби мусобақаларни анъанавий тарзда ўтказилишини маълум қилди. 

Веломарафонда маррага биринчи бўлиб қозоғистонлик Алексей Сидоренко етиб келган бўлса, иккинчи ўринни англиялик Метью Райт ва учинчи ўринни юртдошимиз Шоҳрух Юнусов қўлга киритди.