Данияр Елеусинов икки йиллик танаффусдан сўнг яна рингга қайтди

Қозоғистонлик боксчи кеча Астана шаҳрида ташкил этилган "IBA чемпионлар оқшоми"да Жанубий Африка Республикаси вакили Жабулани Макхенсега қарши жанг ўтказди. 71 килограммгача вазн тоифасида ўтказилган жанг тўлиқ 6 раунд давом этди ва Даниярнинг очколар ҳисобидаги ғалабаси билан якунланди. 

Таъкидлаш жоиз, бу жанг боксчиларнинг расмий рекорди учун ҳисобланмайди. Ҳозирда  Даниярнинг проф боксдаги рекорди 11 ғалабани ташкил этмоқда. У рақибларини 6 та жангда нокаутга учратган. Елеусинов бундан аввалги жангини 2021 йилнинг декабрь ойида ўтказиб, ярим ўрта вазнда IBO чемпионлик камарини қўлга киритган эди. Жабулани Макхенсе эса 14 ғалаба ва 2 мағлубиятга эга. Еттита жангни муддатидан аввал ўз фойдасига ҳал қилган.