Денис Лебедев: "Кличко ҳақида гапиришни истамайман"

Биринчи оғир вазн тоифасида (- 90,7 кг) собиқ мутлақ жаҳон чемпиони, россиялик собиқ боксчи Денис Лебедев (32-3) қачонлардир украиналик ака-ука собиқ боксчилар — Виталий Кличко (45-2) ва Владимир Кличколар (64-5) билан Украинада учрашганми ёки йўқ, деган саволга жавоб берди.

Маълумот учун, армияда хизмат қилганидан кейин Лебедев яна тўрт йил Ялта ва Киев шаҳарларида шахсий қўриқчи бўлиб ишлаган.

"Йўқ, ўша пайтда мен бу боксчилар билан учрашмаганман. Кейинчалик Москвада мен мағлубиятга учраган Гильермо Жонс билан жангдан сўнг, диванда ўтирган пайтимда, Виталий Кличко ёнимга келган эди... Бироқ, мен Кличко ҳақида гапиришни хоҳламайман. Чунки ўша вақт ҳозирги замон билан кесишади", - деди Лебедев.

Денис Лебедев 2019 йилда спортчилик фаолиятини якунлаган эди. У сўнгги бор 2019 йилнинг 21 декабрида Табисо Мчунуга қарши рингга кўтарилиб, мағлуб бўлган эди.