Депутат Ўзбекистон таэквондо ИТФ Миллий ассоциациясига вице-президент этиб сайланди

Ўзбекистон “Миллий тикланиш” демократик партияси томонидан ҳам аҳолини жисмоний тарбия ва спортга кенг жалб қилиш, улар ўртасида соғлом турмуш тарзини оммалаштириш, унут бўлиб бораётган миллий спорт ўйинларини қайта тиклаш, улар асосида спорт мусобақаларини ташкил этиш орқали ёшларда миллий қадриятларимиз, урф-одат ва анъаналаримизга ҳурмат туйғусини шакллантириш борасида бир қатор ибратли ишлар амалга ошириб келиняпти.

Ушбу йўналишдаги ишларнинг самарадорлигини ошириш мақсадида партиянинг Тошкент шаҳар кенгаши ҳамда Ўзбекистон таэквондо ИТФ миллий ассоциацияси ўртасида ҳамкорлик Меморандуми имзоланди. Меморандумни имзолашдан кўзланган асосий мақсад – аҳоли, хусусан, ёшлар ўртасида таэквондо ИТФ спорт турини оммалаштириш, зарарли одатлардан воз кечиш, хотин-қизлар ўртасида “Соғлом турмуш тарзи” спорт мусобақаларини ташкил этиш борасидаги ишларни ҳамкорликда амалга оширишдан иборат.

ЎзМТДП Тошкент шаҳар Кенгаши раиси, Халқ депутатлари Тошкент шаҳар Кенгаши депутати Отабек Жиянбоев Ўзбекистон таэквондо ИТФ миллий ассоциациясига вице-президент этиб сайланди.

Ўзбекистон таэквондо ИТФ миллий ассоциацияси билан имзоланган Меморандум асосида ҳамкорликда ўтказиладиган тадбирлар, спорт мусобақалари юртимизда ушбу спорт турининг янада ривожланишига ҳисса қўшиши шубҳасиз.