Дилмурод Набиев: “Биргаликда бу фалокат оқибатларини бартараф этамиз“

Фавқулодда вазият оқибатларини бартараф этиш мақсадида, сув омбори атрофидаги ҳудудлар аҳолиси хавфсиз жойга эвакуация қилиниб, бошпана ва озиқ-овқат билан таъминланди.

Бугун, Ўзбекистон Республикаси Жисмоний тарбия ва спорт вазири Дилмурод Набиев Сардобадаги фожиа натижасида уй-жойидан айрилиб, Гулистон ихтисослаштирилган олимпия захиралари мактаб-интернатига жойлаштирилган 700 нафарга яқин фуқаронинг ҳолидан хабар олди ва сардобаликларга яратилган шарт-шароитлар билан танишди.

– Бу фалокат биргина сизларнинг бошингизга келган мусибат эмас. Бугун бутун халқимиз сиз билан бирга. Ҳаммамиз бирлашиб, бу бахтсиз ҳодиса оқибатларини тезроқ бартараф этишга ҳаракат қиламиз. Асло тушкунликка тушманг, тез кунларда яна одатий ҳаёт тарзига қайтасизлар. Бу ерда сиз ва фарзандларингиз учун барча шароитлар яратиб берилади, – деб айтиб ўтди Жисмоний тарбия ва спорт вазири Д.Набиев Гулистон ИОЗМИга жойлаштирилган аҳоли билан мулоқот чоғида.

Жисмоний тарбия ва спорт вазирлиги томонидан табиий офатдан азият чеккан Сардоба тумани аҳолисига 18 турдаги озиқ-овқат маҳсулотлари, 12 турдаги жами 1500 дан ортиқ спорт жиҳозлари, 5 хилдаги иссиқ кийим-кечак, гигиеник воситалар ҳамда болалар учун бадиий китоблар жамланмалари ва мактаб-ўқув қуроллари тақдим этилди.