Дрю Добер UFC рекордини ўрнатди

Қизиғи шундаки, Добер ташкилотнинг енгил дивизионида айнан нокаут билан ғалаба қозониш бўйича рекорд ўрнатди. Канадалик устидан қозонилган ғалаба Добернинг дунёнинг энг кучли лигасидаги ўнинчи нокаути бўлди.

Икки тенг раунддан сўнг вазият америкалик зарарига ишлаётган, камига учинчи раундда рақибининг белидан паст қисмига зарба бергани учун ундан очко олиб ташланганди. Дрю ана шундай қийин вазиятдан чиқиб кета олди. Добер учинчи раунднинг иккинчи дақиқасида ҳужумга ўтди ва рақибини нокаутга учратди.  

Эътиборлиси, айнан шу тўқнашув Канададаги турнирнинг "Энг яхши жанги" деб топилиб, ҳар икки аралаш яккакураш устаси гонорарга қўшимча равишда 50 минг доллардан бонус олишди. 37 ёшли Дрю Добер 2013 йилдан бери дунёнинг энг кучли Лигасида ўз жангларини ўтказиб келяпти.