Дунёнинг 182-ракеткаси Тьяго Сантьягода чемпион бўлди

Мусобақанинг ҳал қилувчи финал учрашувида дунёнинг 182-ракеткаси бўлиб турган бразилиялик Тьяго Сейбот рейтингнинг 38-поғонасидан жой олган норвегиялик Каспер Руудни мағлуб этишнинг уддасидан чиқди - 7/5, 4/6, 6/3. Икки соату 16 дақиқа давом этган баҳсда Тьяго 17, Каспер эса 4 та эйс зарбасини амалга оширди. Бу теннисчиларнинг ўзаро илк тўқнашуви эди. 

Santiago Open турниридаги муваффақиятли иштирок Сейботга 101,285 доллар мукофот пули ҳамда 250 рейтинг очкосини тақдим этди. 19 ёшли Тьяго фаолиятидаги илк совринини айнан Сантьягода қўлга киритди. У шу кунгача турнирлардаги иштирокидан 130,386 доллар ишлаб олганди.