Дзюдо афсонаси Илиас Илиадисни табриклаймиз!

Илиас Илиадис 1986 йил 10 ноябрь куни Грузиянинг Ахмета шаҳрида грек оиласида таваллуд топган. 2004 йил Афинада ўтказилган ёзги Олимпия ўйинларида -81 килограмм вазн тоифасида олтин медални қўлга киритиб, дзюдо тарихида энг ёш (17 ёш) Олимпиада чемпионига айланган. 

Лондон-2012 Олимпиадаси бронза медали соҳиби. Токио (2010), Париж (2011) ва Челябинск (2014)да ўтган жаҳон чемпионатлари ғолиби. 

Шунингдек, жаҳон чемпионатларининг 2 карра кумуш ва 1 бор бронза медали совриндори. Пекин-2008 ёзги Олимпия ўйинларининг очилиш маросимида Греция терма жамоасининг байроқдори бўлган.

"Ўзбекистонда давлат раҳбарининг спортга қаратаётган эътиборини алоҳида айтиб ўтмоқчиман. Олимпиада циклида мамлакат Президентининг қўллаб-қувватлаши спортчига жуда катта куч беради. Фаолиятим давомида кўп давлатларда бўлдим. Лекин Ўзбекистондагидек шароитни ҳеч қаерда учратганим йўқ. Шу жиҳат мени бу мамлакатда ишлашимга ундади ва кўплаб давлатлар орасидан Ўзбекистонни танладим. Ўзбек дзюдоси ҳақида бутун дунё билади. Бу ердан кўп карра Олимпиада совриндорлари, жаҳон чемпиони бўлган Абдулло Тангриев, Ришод Собиров каби афсонавий дзюдочилар чиққан. Ўзбекистонда ўзига хос дзюдо анъанаси бор. Бу жамоага мураббий бўлиб келиш мен учун катта шараф. Энди мен бу анъанани давом эттиришим керак", - деганди Илиадис. 

Фурсатдан фойдаланиб, мураббийлар, ҳакамлар, дзюдочилар, умуман катта ўзбек дзюдоси оиласи номидан терма жамоамиз бош мураббийи Илиас Илиадисни бугунги таваллад куни билан муборакбод этамиз. Унга аввало сиҳат-саломатлик, оилавий хотиржамлик, Ўзбекистон терма жамоаси билан Токио Олимпиадасида тарихий натижаларни кўрсатишини тилаймиз.