Дзюдочиларимизнинг Париж-2024 Олимпиадасига тайёргарлиги муҳокама қилинди

Ўзбекистон дзюдо федерациясида айни шу мавзуда йиғилиш бўлиб ўтди. Федерация бош котиби Азиз Собиров, раиси ўринбосари Зафар Қаҳрамонов, терма жамоалар менежери Элдор Қаҳҳоров ва бошқа масъуллар иштирокида ўтган йиғилишда дзюдочиларимизнинг олимпия ўйинларига тайёргарлик масаласи муҳокама қилинди. 

Олимпиада бошланишига бир ярим ойдан сал кўпроқ қолмоқда. Мураббийлар ва масъуллар зиммасида дзюдочиларни ўша пайтга юқори спорт формасида тайёрлаб бориш вазифаси турибди. Йиғилишда бунинг учун федерация томонидан барча чора-тадбирлар амалга оширилиши айтилди. 

Дзюдочиларнинг машғулотидан тортиб, то фармакология, витаминизацияси ва ҳатто уйидаги муаммоларигача эътибор қаратиш лозимлиги уқтирилди. Албатта, муҳим спорт мусобақаси олдидан спортчининг уйида қандайдир муаммоси бўлса, натижа аниқ яхши бўлмайди. Йиғилишда бу масалага ҳам жиддий эътибор қаратиш лозимлиги айтилди.