12 июн 11:37
Янгиликлар

Теннис

Энди Маррей мавсумдаги иккинчи "Челленжер" совринини қўлга киритди

Буюк Британия пойтахти Лондон шаҳридаги Сурбитон туманида теннис бўйича "Челленжер" туркумига кирувчи турнири якунига етди.

Финал учрашувида дунёнинг 43-ракеткаси бўлиб турган британиялик Энди Маррей ATP рейтингида 134-поғонада бораётган австриялик Юрий Родионовга қарши кортга чиқди ва ортиқча қийинчиликсиз ғалаба қозонди - 6/3, 6/2.

Теннисчиларнинг ўзаро иккинчи учрашувида ҳам Маррей зафар қучди. Етмиш дақиқа давом этган баҳсда Маррей 8, Родионов 7 та эйс зарбани амалга оширган. Иккала теннисчи ҳам қўшхатога йўл қўймади.

Энди Маррей мавсумдаги иккинчи "Челленжер" турнири бош совринини қўлга киритди. У бир ҳафталик меҳнатидан 125 очко ҳамда 19,650 евро мукофот пули ишлаб олди. Родионов эса 75 очко ва 11,570 еврога эга бўлди.