Энг фаол спорт журналистлари тақдирланди

“Халқ билан мулоқот ва инсон манфаатлари йили” деб ном олган 2017 йилда ҳам журналистлар мамлакатимиз ҳаётидаги энг муҳим воқеа-ҳодисаларни, шу жумладан, спорт оламида амалга оширилаётган кенг кўламли ишларни ёритишда фаоллик кўрсатмоқдалар. Ўз навбатида, оммавий ахборот воситалари ходимлари шахсан давлатимиз раҳбарининг юксак эътибор ва ғамхўрлигини ҳис этиб келмоқдалар.

Ўзбекистон Республикаси Вазирлар Маҳкамасининг “Оммавий спорт тарғиботини янада кучайтириш чора-тадбирлари тўғрисида”ги қарорида соҳада фаолият кўрсатувчи журналистларни рағбатлантириб бориш кўзда тутилган. 2004 йилдан Ўзбекистон Республикаси Жисмоний тарбия ва спорт давлат қўмитаси, Ўзбекистон болалар спортини ривожлантириш жамғармаси, Ўзбекистон матбуот ва ахборот агентлиги, Ўзбекистон Миллий телерадиокомпанияси ҳамкорлигида “Энг фаол спорт журналисти” республика танлови ўтказиб келинмоқда. Биринчи мукофот соҳибига энг кам ойлик иш ҳақининг 20 баробари, иккинчи мукофот соҳибига 15 баробари, учинчи мукофот эгасига эса энг кам ойлик иш ҳақининг 10 баробари миқдорида пул мукофотлари, яна уч журналистга рағбатлантирувчи совринлар топширилади.

Спорт журналистикаси соҳасида 2016-2017 йиллар мобайнида ўзининг фаоллиги билан ажралиб турган бир қатор журналистлар танлов ғолиблари деб топилди.

Бугун Ўзбек миллий академик театрида ўтказилган тантанли маросим чоғида Ўзбекистон Республикаси Жисмоний тарбия ва спорт давлат қўмитаси раиси Рустам Қурбанов қуйидаги журналистларга мукофотларни топширди:

1-ўрин - Нарзулла Сайдуллаев, championat.asia сайти журналисти;
2-ўрин - Марина Якубова, ЎзМТРК “Спорт” телеканали Трансляция ва спорт янгиликлари студияси бош муҳаррири ўринбосари;
3-ўрин - Бобур Акмалов, “Орият Доно” радиоси ижодий гуруҳи раҳбари, спорт эшиттиришлари муаллифи ва бошловчиси.

Рағбатлантирувчи мукофотлар билан “Интерфутбол” газетаси бош муҳаррири Ахадхон  Абдуҳамидов, “sports.uz” сайти муҳаррири Бекзод Исаев ва ЎзМТРК “Спорт” телеканали Таълим-тарбия бош муҳарририяти режиссёри Нилуфар Касимова тақдирланди.

Биз барча журналистлар ва оммавий ахборот воситалари ходимларини касб байрамлари билан самимий муборакбод этамиз ҳамда уларга ижодий зафарлар тилаймиз!

Ўзбекистон Республикаси Жисмоний тарбия ва спорт давлат қўмитаси матбуот хизмати