Эркин курашчиларимиз умумжамоа ҳисобида тўртинчи бўлишди

Мусобақанинг охирги икки куни эркин кураш мусобақаси ўтказилди. Унда иштирок этган Олимжон Ҳикматов ва Абдурауф Бозорбоев мураббийлигидаги эркин курашчиларимиз якунда 1 та олтин, 1 та кумуш, 2 та бронза медали билан умумжамоа ҳисобида Эрон, Ҳиндистон ва Қозоғистон терма жамоаларидан сўнг тўртинчи ўринни эгаллади. 

Таъкидлаш жоиз, Осиё чемпионатида терма жамоамизнинг асосан иккинчи таркиби иштирок этди. Жамоамизга Осиё чемпионатидаги ягона олтин медални 61 кг вазн тоифасидаги эркин курашчимиз Жаҳонгирмирзо Туробов тақдим этди. У финал учрашувида қозоғистонлик Адлан Аскаровни 14-9 ҳисобида мағлубиятга учратди. 

Сирожиддин Ҳасанов (70 кг) кумуш медални қўлга киритган бўлса, Рио Олимпиадасининг бронза медали совриндори Ихтиёр Наврўзов (74 кг) ва Нодиржон Сафаров (57 кг) Осиё чемпионатининг бронза медалига эга чиқишди.