Эрматов, Аҳмедов, Чусовитина, Қосимов депутатлик учун сайловларда қатнашади

Эътиборга молик жиҳати шундаки, бу галги сайловларда спортимиз элитаси вакилларини ҳам кўриш мумкин. Хусусан, Ўзбекистон Миллий олимпия қўмитаси раисининг биринчи ўринбосари Равшан Эрматов, Ўзбекистон футбол ассоциацияси биринчи вице-президенти Одил Аҳмедов, ОКМК футбол клуби бош мураббийи, футболимиз афсонаси Миржалол Қосимов ҳамда афсонавий гимнастикачимиз Оксана Чусовитинанинг номзоди етакчи сиёсий партияларимиз томонидан сайловга қўйилган.

Миржалол Қосимов сўнгги беш йил давомида Халқ депутатлари Тошкент шаҳар Кенгаши депутати сифатида фаолият юритди. Унинг номзоди янги беш йиллик муддатга ҳам қўйилди. Равшан Эрматов, Одил Аҳмедов ва Оксана Чусовитина Олий Мажлис Қонунчилик палатаси депутати бўлиш учун сайловда ўз имконият ва омадини синаб кўради.   

Қизиқ, агар Эрматов ва Аҳмедов сайловда ғалаба қозонса, МОҚ ҳамда ЎФАдан кетиб, бор эътиборини халқ фаровонлиги йўлидаги фаолиятга қаратармикан? Чунки, Олий Мажлис Қонунчилик палатасидаги фаолият маҳаллий Кенгашлардагисидан кескин фарқ қилади. Деярли 24/7 режимда турли йиғилишлар, тадбирлар, ўзи сайланган ҳудудларини доимий ўрганишлар билан банд (тўғри, ҳамма депутатлар ҳам шундай ишлайвермайди) бўлади.