Фарғонада кураш бўйича Ўзбекистон чемпионати якунланди

Жами 15та вазн тоифаси бўйича кечган баҳсларга барча полвонлар жиддий тайёргарлик билан келганликлари, мусобақанинг нуфузини ошириш баробарида уни янада қизиқарли ва муросасиз ўтишини таъминлади.

Мусобақанинг сўнгги кунида оғир вазнли иштирокчилар гиламга чиқишди. Аёллар ўртасида -87 кг вазн тоифасида Сурхондарё вилояти вакиласи Юлдуз Муҳаммадиева хоразмлик Раҳимахон Йўлдошевани ҳалол баҳоси билан мағлубиятга учратди. 87 кг дан юқори вазн тоифасида эса пойтахтлик Санам Эркинбоева қашқадарёлик Обида Алмадўстовага ҳеч қандай имконият қолдирмади.

Эркаклар ўртасида -100 кг ҳамда ундан юқори вазн тоифаларида гиламга чиққан полвонлар ўртасидаги беллашувлар ҳам ишқибозларнинг диққат марказида бўлди. Унда номдор полвонларимиздан қашқадарёлик Шерали Жўраев ҳамда Сурхондарё фарзанди Муҳсин Ҳисомиддинов шохсупанинг энг юқори поғонасидан жой олишди.

Мусобақа якунида ғолиблар тантанали тақдирланди. Ўзбекистон чемпионатида кучли учликдан жой олган спортчиларга медаль, диплом ва эсдалик совғалари топширилди. Шунингдек, мусобақада фаоллик кўрсатган бир гуруҳ спортчилар ва ҳакамлар ҳам федерациянинг мукофотларига сазовор бўлишди.