Фарид Башарат: "Кутдим, аммо бу содир бўлмади"

У ташкилотдаги фаолиятини мағлубиятсиз рекорд билан якунлаганини таъкидлади.

"Хабар тасдиқланди: мен энди UFC’да жанг қилмайман. Ташкилотда жуда муваффақиятли давр ўтказдим. Октагонда эришганларимдан фахрланаман ва натижаларимдан мамнунман", — дейди Башарат.

Жангчи ўз вазн тоифасида UFC’даги энг узун амалдаги ғалабали серияга эга эканини, умумий ҳисобда эса бу кўрсаткич ташкилотда тўртинчи ўринда туришини билдирди. Шунингдек, у ўзини дунёнинг энг яхши енгил вазн жангчиси деб ҳисоблашини айтди. Башаратнинг сўзларига кўра, у жароҳатлар ва вазн билан боғлиқ муаммоларга қарамай жанглардан бош тортмаган ҳамда титулга яқинлашиш учун кучли рақибларни сўраб келган. У UFC’дан кетиши спорт натижалари билан боғлиқ эмас, деб ҳисоблайди. Башарат ташкилот "аввалгидек эмаслиги" ва бошқа йўналишда ривожланаётганини таъкидлади.

Жангчи, шунингдек, сўнгги жангидан кейин унга янги шартнома ёки рақиб таклиф қилинмаганини маълум қилди.

"Сўнгги жангимдан кейин менга бирор марта ҳам шартнома ёки рақиб таклиф қилишмади. Кутдим, аммо бу содир бўлмади. UFC’даги фаолиятим давомида ҳеч қачон жангдан бош тортмаганман", — дейди спортчи.

Башарат UFC ходимлари ва мухлисларига миннатдорлик билдириб, ҳали ёш эканини ва фаолиятидаги энг яхши давр олдинда эканига ишонишини айтди.