Федерацияларнинг Токио Олимпиадасидаги иштироки ва тайёргарлиги сарҳисоби бошланди

Дастлаб Ўзбекистон ROWING&CANOE федерацияси билан мазкур масалалар муҳокама қилинди.

Йиғилишда МОҚ раиси Рустам Шоабдураҳмонов ва унинг ўринбосари Шерзод Ташматов, Ўзбекистон спорт фахрийлари кенгаши раиси Баҳодир Махситов, МОҚ қошидаги РСТИАМ директори Абдушукур Садиков, Ўзбекистон ROWING&CANOE федерацияси бош котиби Вячеслав Дидрих, Сув спорти турлари бўйича Республика Олий спорт маҳорати мактаби мутасаддилари, терма жамоа мураббийлари иштирок этишди.

Даставвал, ушбу спорт турининг оммавийлигини ошириш, моддий-техник базанинг вилоятлар кесимидаги ҳолати таҳлил қилинди. Қайд этиш жоиз, эшкак эшувчиларимизнинг ҳам Токио-2020 Олимпия ўйинларига муносиб тайёргарлик кўриши учун давлатимиз томонидан барча шароитлар яратиб берилди: федерация талабномасига кўра Португалия ва Польшадан замонавий қайиқлар харид қилинди, узлуксиз маҳаллий ҳамда хорижий йиғинлар ташкил этилди. Бироқ якунда 4 нафар спортчигина лицензия қўлга кирита олди холос. Шу боис йиғилиш анчагина танқидий руҳда ўтди.

“Ҳақиқатдан ҳам, спортчиларимизнинг тайёргарлиги учун барча шароитлар яратиб берилди. Тайёргарлик даври учун тузган стратегиямиз ўзини оқламади. Қолаверса, спортчиларимизда ғолиблик руҳи етишмади ва ёшларимизда тажриба камлик қилди. Бундан катта хулоса чиқардик. Ханчжоу-2022 Осиё ва Париж-2024 Олимпия ўйинларига тайёрланишда йўл қўйган хатоларимизни такрорламасликка ҳаракат қиламиз”, – деди Вячеслав Дидрих.

Мутасаддилар томонидан мураббийлар штаби билан қайд этилган натижаларни янада чуқур таҳлил қилиш, селекция ишларини кучайтириш ва кучли захира спортчиларини тарбиялаш бўйича керакли топшириқлар берилди. Шунингдек, Ханчжоу ва Париж мусобақаларига тайёргарлик режалари ҳам муҳокама қилинди.