ФИДЕ Жаҳон Кубоги. Шамсиддин Воҳидов - Сергей Карякин илк баҳси бўлиб ўтди + ФОТО

Дунёнинг энг кучли шахматчиси Магнус Карлсен ҳам иштирок этаётган мусобақанинг умумий мукофот жамғармаси 1 892 500 долларни ташкил қилади. Ғолиб якунда 110 000 долларга эга бўлади. 

Хабар берганимиздек, Жаҳонгир Воҳидов, Шамсиддин Воҳидов, Нодирбек Ёқуббоев, Жавоҳир Синдаров ва Нодирбек Абдусатторовдан иборат Ўзбекистон эркаклар терма жамоасининг бари илк босқичда (2 партия) умумий ғалабага эришиб, 1/64 финалга йўл олишганди. 

Эътиборга молик жиҳати, айнан 1/64 финал босқичида ўтган йили гроссмейстер унвонини олган 19 ёшли шахматчимиз Шамсиддин Воҳидов дунё тарихидаги иккинчи ёш гроссмейтер, 2015 йилги ФИДЕ Жаҳон Кубоги ғолиби, тезкор шахмат бўйича жаҳон чемпиони (2012 йил), блиц бўйича жаҳон чемпиони (2016) 2013 ва 2019 йилларда жамоавий жаҳон чемпионатида икки бор чемпионлик тожини кийган россиялик Сергей Карякинга қарши дона сурди. 

Карякин тўғридан-тўғри 1/64 финалдан баҳсларга киришган бўлса, Шамсиддин 1/128 финалда грузиялик Лука Пайчадзени 2:0 ҳисобида мағлубиятга учратганди. Кеча ўтказилган илк партияда қора доналарда ҳаракат қилган Воҳидов рейтингнинг 14-поғонасида бораётган кучли рақибига имкониятни бой берди. Бугун Шамсиддин иккинчи партияда оқ доналарда ҳаракат қилади.