30 окт 10:08
Янгиликлар

Бокс/ММА

Фрэнсис Нганну WBC рейтингида Топ-10`га киритилади

Бутунжаҳон бокс иттифоқи (WBC) собиқ UFC чемпиони Фрэнсис Нганнуни супероғир вазн тоифасининг расмий рейтингига киритишга қарор қилди.

Бундай хулосага камерунлик аралаш яккакураш устасининг амалдаги WBC чемпиони Тайсон Фьюрига қарши ўтказган жангидан кейин келинган. Бу ҳақда WBC президенти Маурисио Сулейманнинг сўзларига таянган ҳолда Нганнунинг мураббийи Дьюи Купер хабар берди.

"WBC президенти Маурисио Сулейман Фрэнсисни рейтингнинг Топ-10`талигига киритишини айтди. Унинг айтишича, Нганну рейтингнинг кучли ўнталигида бораётган айрим боксчилардан кучлироқ экан. Буни у Фьюрига қарши жангда исботлади", - деди Купер.

Эслатиб ўтамиз, шанба оқшомида Саудия Арабистонининг Ар-Риёд шаҳрида ўтказилган бокс оқшомида Фьюри ҳакамларнинг айри қарори билан ғалаба қозонган эди. Учинчи раундда Нганну "Лўлилар қироли"ни нокдаун ҳолатига ҳам тушириб қўйганди. Кўпчилик ушбу жангда ҳакамларнинг қароридан норози бўлган эди.