Гарбин Мугуруса WТА Якуний турнири чемпиони!

Турнир финалида испаниялик Гарбин Мугуруса ва эстониялик Анетт Контавейт бош соврин учун баҳс олиб боришди.

1 соату 39 дақиқа давом этган учрашувда жаҳоннинг бешинчи ракеткаси 28 ёшли Гарбин WТА рейтингида саккизинчи ўринни эгаллаб турган 25 ёшли Анеттни 6/3, 7/5 ҳисобида мағлуб  этиб, WТА Якуний турнири чемпионига айланди. Спортчиларнинг ўзаро учрашувларида испаниялик теннисчи устунликни сақлаб қолди - 4:2.

Бу Мугурусанинг WТА Finals'даги биринчи унвони ҳисобланади. Шунингдек, ушбу чемпионлик Мугуруса учун мавсумдаги учинчи ва фаолиятидаги ўнинчи совриндир. Бу ғалаба унга 1 570 000 доллар мукофот пули ва 1 375 рейтинг очкосини келтирди.

Гарбин йилнинг Якуний турнирида ғолиб чиққан биринчи испаниялик аёл теннисчидир. Ушбу муваффақият орқали Мугуруса мавсумни жаҳоннинг учинчи ракеткаси сифатида якунлайди.