27 ёшли Контавейт "Уимблдон"дан сўнг фаолиятини якунлайди

У 6 та WТA турнири чемпиони ҳисобланади. 2022 йилда Анетт WTA рейтингида иккинчи ўрингача кўтарилди. Жорий мавсум аввалида эстониялик бел қисмидаги муаммолар туфайли икки ойни ўтказиб юборди.

“Бугун мен профессионал спортчи сифатида фаолиятимни якунлаётганимни эълон қиламан. Шифокор қабулига бир неча бор борганим ва тиббий жамоам билан ўтказилган маслаҳатлашувдан сўнг, менда умуртқа дискларида дегенератив ўзгаришлар борлигини билдим.

Бу менга тўлиқ машқ қилиш ёки рақобатни давом эттириш учун имкон бермайди. Шундай экан, бундай кучли рақобатли Турда юқори даражада чиқишни давом эттиришнинг имкони йўқ.

Теннис менга кўп нарса берди ва кўп нарсани ўргатди, бунинг учун жуда ҳам миннатдорман. Мен учун Эстония байроғини теннис кортларига олиб чиқиш ва бутун дунё бўйлаб мухлисларим қаршисида ўйнаш муҳим эди.

Мен "Уимблдон"даги сўнгги чиқишимдан сўнг янги синовларга тайёрман, у ерда ўйиндан завқланаман ва бор кучим билан рақобатлашаман.", - деди Контавейт.