Ғолиби 6 млн долларга эга чиққан Six Kings Slam турнири якунланди

Six Kings Slam турнирининг ҳал қилувчи финал учрашувида дунёнинг биринчи ва иккинчи ракеткалари - испаниялик Карлос Алькарас ҳамда италиялик Янник Синнер ўзаро тўқнаш келишди. Синнер ортиқча қийинчиликсиз сайёрамизнинг биринчи ракеткасини 6/2/ 6/4 ҳисобида мағлубиятга учратди. 

Теннисчиларнинг ўзаро учрашувларида ҳамон катта фарқ билан Алькарас олдинда бормоқда - 11:5. Етмиш уч дақиқа давом этган баҳсда Синнер 3, Алькарас 4 та эйс зарбасини амалга оширди. Қўшхатолар бўйича Карлос мутлақ "устунлик" қилди - 3 га 0. Брейклар бўйича устунлик худди шу ҳисоб кўринишида Янник фойдасига бўлди. 

Six Kings Slam турнирининг учинчи ўрни учун бўлиб ўтган учрашувида америкалик Тейлор Фриц сербиялик Новак Жоковични мағлубиятга учратди - 7:6 (7:4). Новак биринчи сетдан кейин баҳсни давом эттира олмаслигини маълум қилди. 

Чемпион Синнер 6 миллион АҚШ доллар миқдоридаги мукофот пулини қўлга киритди. Ушбу суммадан 4,5 миллиони чемпионлик, қолган 1,5 миллион турнирдаги иштирок учун берилди. Қолган иштирокчилар 1,5 миллион доллардан ишлаб олишди.