Gran Prix Zagreb Open. Ислом Баҳромов ва Жасурбек Ортиқбоев олтин учун гиламга чиқади

Дунёнинг ўттизга яқин давлатидан юнон-рум кураши усталари иштирок этаётган мусобақада юртимиз спорт шарафини Равшан Рўзиқулов мураббийлигидаги полвонларимиз ҳимоя қиляпти. Кеча ўтказилган саралаш беллашувларидан сўнг медаллар учун гиламга чиқадиган курашчилар номи маълум бўлди.   

Қувонарлиси, бугун финал босқич баҳсларида терма жамоамизнинг беш нафар аъзоси Загреб Гран-При турнири медаллари учун гиламга чиқади. -60 кг вазн тоифасидаги курашчимиз, Осиё чемпиони Ислом Баҳромов финалда туркиялик Ахмет Уярга қарши баҳс олиб боради. 

-55 кг вазндаги вакилимиз Жасурбек Ортиқбоев германиялик Фабиан Шмиттга қарши гиламга чиқади. Агар у ғалаба қозонса, олтин медални қўлга киритади. Шу вазндаги яна бир курашчимиз Илҳом Баҳромов италиялик Жиованни Френини ютган тақдирда кумуш медалга эга чиқади. Бу вазнда иштирокчилар сони кам бўлгани боис, беллашувлар айлана тизимда ўтказилди. 

Феруз Тўхтаев, Мирзобек Раҳматов ва Арам Варданян эса Загреб Гран-Присининг бронза медаллари учун гиламга чиқишади. Биргина Раҳматов ўтиш беллашувида иштирок этади. Унинг рақиби италиялик Франческо Беллино бўлади. Ушбу жуфтлик ғолиби бронза медали учун молдовалик Дониёр Исламовга қарши баҳс олиб боради. 

Олтин медаль учун

-60 кг: Исломжон Баҳромов (Ўзбекистон) – Ахмет Уяр (Туркия) 

-55 кг: Жасурбек Ортиқбоев (Ўзбекистон) – Фабиан Шмитт (Германия)

Бронза медаль учун

-60 кг: Феруз Тўхтаев (Ўзбекистон) – Александер Биса (Швеция)/Мича Траш (Польша)

-67 кг: Дониёр Исламов (Молдова) – Мирзобек Раҳматов (Ўзбекистон)/Франческо Беллино (Италия)

-72 кг: Арам Варданян (Ўзбекистон) – Микко Пелтокангас (Финляндия)