Гулистонда 14 январь – Ватан ҳимоячилари кунига бағишлаб югуриш марафони ташкил этилди

Мазкур тадбир Cирдарё вилояти Жисмоний тарбия ва спорт бошқармаси ҳамда вилоят Мудофаа ишлари бошқармаси билан ҳамкорликда Ўзбекистон Республикаси Президентининг 2019 йил 13 декабрдаги Ф-5529-сонли фармойиши ва Ўзбекистон Республикаси Жисмоний тарбия ва спорт вазирининг 2019 йил 31 декабрдаги 2282-сонли буйруғи, шунингдек Сирдарё вилояти ҳокимининг 2019 йил 14 декабрдаги 325-сонли қарори ижросини таъминлаш мақсадида ташкил этилди.

Марафон мусобақаларида 400 нафардан ортиқ иштирокчи ғолиблик учун баҳс олиб боришди. Қизғин ва муросасиз ўтган мусобақалар якунида 1-ўринни ҳарбий хизматчилар ўртасида Ширин шаҳар ҳарбий қисм ходими Абдуллаев Жавоҳир эгаллади.Эркаклар ўртасида аҳоли ва ташкилотлар ходимлари ўртасида ўтган мусобақада эса ғолиблик Гулистон давлат университети талабаси Виктор Цуренкога насиб этди. Мазкур йўналишда аёллар ўртасида ўтган баҳсларда ҳам Гулистон давлат университети талабаси, яъни Дарья Андроповага тенг келадиган рақиб топилмади.

Фахрийлар ўртасида 1-ўринни вилоят сув спорти турларига ихтисослаштирилган БЎСМ йўриқчи-услубчиси Ҳакимжон Шарипов қўлга киритди.Мусобақалар якунида ғолиб ва совриндорлар ташкилотчилар томонидан эсдалик совғалари билан тақдирланишди.Ўзбекистон Республикаси Қуролли кучлари ташкил этилганлигининг 28 йиллиги ҳамда 14 январь – Ватан ҳимоячилари кунини ҳудудларда кенг нишонлаш мақсадида Сирдарё вилояти туман (шаҳар)лар ва Гулистон шаҳрида ҳарбий хизматчилар ҳамда аҳоли ўртасида бир қатор оммавий спорт тадбирлари ўтказилиши режалаштирилган.

Жисмоний тарбия ва спорт вазирлиги Матбуот хизмати