Гулистонда велошоссе бўйича мусобақа старт олди

Сирдарё вилоятининг Гулистон шаҳрида эркаклар ўртасида велоспортнинг шоссе йўналиши бўйича Ўзбекистонда хизмат кўрсатган мураббий Баҳодир Мўминов хотирасига бағишланган республика турнирига старт берилди.  

Мусобақада юртимизнинг турли ҳудудларидан келган 76 нафар спортчидан иборат 7 та жамоа иштирок этмоқда.

Турнирнинг биринчи кунида Чинобод-Учтом йўлида ўтказилган шахсий пойгада Данил Евдокимов биринчи ўринни эгаллади. Спортчимиз 20 км масофага кечган баҳсда 25:50 вақтда марра чизиғини босиб ўтишга муваффақ бўлди. Шунингдек, Константин Элли 26:33 натижа билан иккинчи, Никита Стенковой 26:54 натижа қайд этиб учинчи ўринни қўлга киритди.

Жисмоний тарбия ва спорт вазирлиги, Спортнинг қишки ва мураккаб техник турлари бўйича республика олий спорт маҳорати мактаби ҳамда Сирдарё вилояти жисмоний тарбия ва спорт бошқармаси билан ҳамкорликда Ўзбекистон велосипед спорти федерацияси томонидан ўтказилаётган мазкур хотира турнири 13 мартга қадар давом этади.