Гусковнинг мураббийи: "Мағлубият сабабини биламан"

Эслатиб ўтамиз, "Царевич" ўтган ойда UFC ярим оғир вазн тоифасидаги собиқ чемпион билан қисқа муддатли огоҳлантириш билан жанг қилиб, бешинчи раундда техник нокаут эвазига мағлуб бўлганди.

"Биз сабабларни биламиз, лекин уларни айта олмайман. Шундай бўлиб туради. Жанг давомида қаергадир зарба есангиз, бутун жанг бошқача тус олади. Аслида эса, Богдан ўнинчи рақамли жангчи бўла туриб, ҳамма қўрққан пайтда биринчи рақамли жангчи билан куч синашишга таваккал қилди – шартномасини яхшилади, пул ишлади. UFC унга қарздор, десак ҳам бўлади – у уларни қийин вазиятдан қутқариб қолди. У уяладиган даражада ёмон мағлубиятга учрамади", – деди россиялик мутахассис Sport24 каналига берган интервьюсида.

Шунингдек, Азизян Гусков бу жангда кўпроқ таваккал қилиши керак эди деган фикрга қўшилмайди.

"Таваккал қилиши керак бўлган одам Анкалаев эди. Биз нега таваккал қилишимиз керак? Бизда йўқотадиган нарса йўқ эди. Шунинг учун, Анкалаевнинг зарбалари ўхшамай қолгач, у оёққа ташланиб, ётиб олишга уринди. Бизда эса маълум муаммолар бор эди – бўғиш усули ўхшамади, ўнг қўли билан зарба бера олмади. Нима учун бундай бўлганини биламиз ва бунга жуда хотиржам қараймиз. Магомедни табриклаймиз – у нишонга аниқ тегди ва шундан сўнг ўйин бироз бошқача тус олди. Лекин бу ўйинда Богдан эмас, Магомед таваккал қилиши керак эди. Биринчи рақамли жангчи ётиб олмасдан, нимадир кўрсатиши керак", – деб тушунтирди Азизян.