Ҳамюртимиз IKA вице-президенти этиб сайланди

Йиғилишни IКА президенти Хайдер Фарман олиб борди. Унда Осиё, Африка, Европа ҳамда Панамерика конфедерациялари вице-президентлари, шунингдек IКА Ижроия қўмитаси аъзолари иштирок этишди.

Ижроқўм аъзолари Курашни жаҳон миқёсида ривожлантиришнинг муҳим масалалари, шу билан бирга курашни турли қитъа ва минтақавий ўйинлар дастурига киритилишини муҳокама қилишди.

Ижроия қўмитаси аъзолари Курашни халқаро миқёсда ривожлантиришда IКА фаолиятига ҳар томонлама ёрдам бергани учун шахсан Ўзбекистон Республикаси Президенти ва IКАнинг Фахрий Президенти Шавкат Мирзиёевга миннатдорлик билдирди. Бунинг исботи сифатида 2020 йил ноябрь ойида Курашни жаҳон миқёсида ривожлантириш бўйича Президент Қарори қабул қилинганлиги эътироф этилди.

Ижроия қўмитаси аъзолари курашнинг Ватани бўлган мамлакат - Ўзбекистон билан ўзаро алоқада бўлиш учун янги IКА вице-президенти лавозимини жорий этишга қарор қилишди. 

IКА президенти Хайдар Фарман ушбу янги ташкил этилган лавозимга Ўзбекистон Республикаси Президентининг давлат маслаҳатчиси Абдужаббор Абдусатторович Абдувоҳидовни тайинлашни таклиф қилди. Кенгаш аъзолари ушбу таклифни бир овоздан қўллаб-қувватладилар.

Халқаро Кураш Ассоциациясининг Ижроқўм йиғилишида Ўзбекистон Республикаси Туризм ва спорт вазирининг ўринбосари Авазжон Каримов, Миллий Олимпия қўмитаси раисининг биринчи ўринбосари Равшан Эрматов ҳамда МОҚ Бош котиби Ойбек Касимовлар ҳам иштирок этди.