Ҳасан Назаров бошчилигида Осиё чемпионатида қатнашадиган таркибимиз маълум

Ўз тарихида 19-маротаба ўтказиладиган ушбу қитъа биринчилигида Ҳасан ва Мутал Назаров бошчилигидаги юртимиз каратэчилари ҳам иштирок этади. Куни кеча Наманган вилояти Косонсой шаҳрида Осиё чемпионатига тайёргарлик доирасида ўқув-машғулот семинари ҳамда турли рангдаги белбоғлар учун имтиҳон ташкил этилди. Шунингдек, "Нур Ҳас" марказида ўтган ушбу тадбирлар доирасида Осиё чемпионатига йўл оладиган терма жамоа таркиби ҳам аниқлаб олинди. 

Семинарни 5-ДАН қора белбоғ соҳиби шиҳан Мутал Назаров ўтказди. Унга назарий ва амалий машғулотларда Косонсой "Нур Ҳас" шинкиокушинкай каратэ маркази бош мураббийи 1-ДАН қора белбоғ соҳиби Шамсиддин Эшонов ёрдам берди. Турли рангдаги белбоғлар учун имтиҳондан муваффақиятли ўтган спортчилар декабрь ойида ўтказиладиган Ўзбекистон очиқ чемпионатида қатнашишади. 

Осиё чемпионатининг катталар ўртасидаги -85 кг вазн тоифаси баҳсларида Ички ишлар терговчиси, майор Улуғбек Ҳамдамов ҳамда мутлақ вазнда Отабек Абдураҳимов юртимиз шарафини ҳимоя қилади. Ёшлардан эса Маҳлиё Саидаҳмедова (-50 кг), Шоҳжаҳон Йўлдошбоев (-55 кг), Билолбек Абдужабборов (-45 кг) қитъа чемпионатида қатнашиш учун лецензия қўлга киритишди. Аҳлиддин Зарифжонов (-40 кг) эса захира спортчиси сифатида таркибга киритилди.