Икки карра US Open чемпиони Осака бу йилги иштирокидан қанча ишлаб олди?

Бош соврин учун кечган ҳал қилувчи финал учрашувида дунёнинг тўққизинчи ракеткаси, япониялик Наоми Осака WTA рейтингида 27-поғонадан жой олиб турган беларуслик Виктория Азаренкони 1/6, 6/3, 6/3 ҳисобларида таслим этиб, икки карра US Open чемпионига айланганди. 

Икки ҳафталик муваффақиятли иштирок 22 ёшли Наомига 3 миллион доллар мукофот пули ҳамда қимматли 2000 рейтинг очкосини тақдим этди. Финалда ютқазган 31 ёшли Азаренко эса 1,5 миллион долларга эга бўлди. 

Таққослайдиган бўлсак, ўтган йилги чемпион канадалик Бьянка Андрееску 3 миллион 850 минг доллар, финалчи эса 1 миллион 900 минг долларга ўз ҳамёнини бойитиб олганди. Бу йилги мукофот жамғармаси ўтган сафарги умумий гонорар фондининг 95 фоизини ташкил этди. Яъни, гонорар жамғармаси 5 % қисқариб, 57 миллиондан 53,4 миллион долларга камайтирилди.