Иккинчи ракеткамиз Анталия турнири 1/8 финалида кортга чиқди

Мукофот жамғармаси 115 000 АҚШ долларини ташкил қилувчи Megasaray Hotels Open турнирида вакиламиз Полина Кудерметова ҳам ўз маҳоратини намойиш этди. Мамлакатимизнинг иккинчи ракеткаси илк даврада рейтингда ўзидан 10 поғона юқорида бораётган россиялик Алина Чараевани 7/5, 6/4 ҳисобида мағлубиятга учратганди. 

Афсуски, 1/8 финалда у венгриялик рақибасига тай-брекда имкониятни бой бериб, мусобақадаги иштирокини эрта якунлади. Роппа-роса 90 дақиқа давом этган учрашувда Полина дунёнинг 95-ракеткаси Панна Удвардига 4/6, 6/7(4) ҳисобида мағлуб бўлди. Теннисчимиз иккинчи сетда 1/4 ҳисобида ютқаза туриб, камбэк қила олганди, аммо тай-брекда Панна ғалабани илиб кетди.   

Учрашув давомида Удварди 3, Кудерметова 1 та эйс зарбасини амалга оширган. Қўшхатолар венгрияликда кўпроқ бўлди - 5 га 3. Бу теннисчиларнинг ўзаро ўтказган иккинчи учрашуви эди - 0:2. Икки йил аввал Португалия турнирида ҳам Паннанинг қўли баланд келганди.      

Таққослаш учун, Полина Кудерметова WTA рейтингида 147-ўринни эгаллаб турибди.