Илк бор пара-велоспортчиларимиз мамлакат чемпионатида куч синашишди

18-21 март кунлари бўлиб ўтадиган ушбу мусобақанинг аҳамиятли жиҳати унда илк бор пара-велоспорт бўйича Ўзбекистон чемпионатининг ўтказилаётгани бўлди.

Соғлом спортчилар ўртасидаги беллашувда Данил Евдакимов, Янина Кускова, Камрон Мирзараҳимов каби етакчилар ўз ғалабаларини яна бир бор тантана қилишди. Илк бор ташкил қилинган пара-велоспорт йўналишига яқинда спортчилик фаолиятини якунлаган терма жамоамиз вакили Дилмурод Сиддиқов бош мураббий этиб тайинланди.

Таъкидлаш жоиз, бугун имконияти чекланган спортчилар ўртасида беллашувлар якунланди. Унда иштирокчилар юртимизда аҳолининг ҳар бир қатламига спорт билан шуғулланиш учун яратиб берилаётган шароитлардан мамнун эканликларини таъкидлаб ўтишди. 

Ўз навбатида, янги тузилган ушбу жамоа Ўзбекистон Миллий Паралимпия ассоциацияси билан ҳамкорликда Париж-2024 Паралимпия ўйинлари йўлланмалари учун кураш олиб бориши кўзда тутилган.