Илк маротаба ўтказилаётган "Онлайн велопойга"да фаол иштирок этинг!

Ана шундай мусобақалардан яна бири Ўзбекистон Республикаси Жисмоний тарбия ва спорт вазирлиги ҳамда Ўзбекистон велосипед спорти федерацияси томонидан ўтказилаётган “Онлайн велопойга” мусобақасидир. Ушбу мусобақани ўтказишдан кўзда тутилган мақсад, аввало, аҳоли саломатлигини мустаҳкамлаш, уларни жисмоний чиниқтириш ва соғлом турмуш тарзини тарғиб қилишдан иборат.

Онлайн велопойгада ўзингизга қулай бўлган шароитда, исталган вақтда иштирок этишингиз мумкин. Мазкур онлайн мусобақанинг иштирокчисига айланишингиз учун www.yoshlarsport.com сайтидан рўйхатдан ўтказишингиз керак. Сўнгра сизнинг электрон манзилингизга виртуал ВIB-рақамингиз ҳамда керакли иловаларга ҳаволалар келиб тушади.

Онлайн велопойгада иштирок этиш учун велосипед ёки велотренажёрда босиб ўтган масофангиз натижасини қайд этиб боришингиз керак. Уларни тасвирга тушириб, мобил илова ва спорт гаджетлари орқали сайтга юборишингиз лозим. Шунингдек, шахсий Инстаграм саҳифангиз орқали  #minsport #cyclinguz #ProRun хештегидан фойдаланган ҳолда, ўз натижаларингизни Инстаграм ижтимоий тармоғига жойлаб, турнир иштирокчисига айланишингиз мумкин.

Натижаларни рўйхатдан ўтказиш ва қайта ишлаш 21-26 сентябрь кунлари сайт орқали амалга оширилади. 2020 йил 31 декабргача ҳар бир босқич якунига кўра, ҳар шанба куни соат 20:00да танловнинг барча шартларини бажарган иштирокчилар орасида совринлар ўйналади. Ғолиб Инстаграмнинг prorun.uz саҳифасидаги рандомизер воситасида бевосита эфир орқали аниқланади.

Мусобақа ғолиблари ва иштирокчилари Ўзбекистон Республикаси Жисмоний тарбия ва спорт вазирлиги ҳамда Ўзбекистон велосипед спорти федерациясининг совринли ютуқларига эга бўлади.

ЎзМУ талабаси Умида Ачилдиева тайёрлади