Истомин Боргесга мағлуб бўлиб, яккалик баҳсларини тарк этди

Мукофот жамғармаси 45,730 еврони ташкил қилувчи мусобақанинг асосий тўри илк даврасида дунё рейтингининг 93-поғонасидан жой олган португалиялик Нуно Боргесга қарши кортга чиқди. Икки сет давом этган баҳсда афсуски омад ҳамюртимиздан юз ўгирди ва португалиялик теннис устаси учрашувда ғалаба қозонди: 6/3, 6/0.

Теннисчимиз саралашнинг илк даврасида турнирга имтиёзли равишда қўйилган португалиялик Гильерме Валдолейросни 6/1, 6/1 ҳисобида мағлуб этганди. Саралашда саккизинчи рақам остида таснифланган Истомин шунингдек асосий тўрга йўлланма берган саралашнинг финал учрашувида турнирнинг учинчи ракеткаси, қозоғистонлик Денис Евсеевдан ҳам устун келган эди - 6/3, 6/3.

Таққослаш учун, Денис айни пайтда ATP рейтингида 481, Боргес эса 93-ўринни эгаллаб турибди. Энди теннисчимиз россиялик Евгений Карловский билан биргаликда ушбу мусобақанинг жуфтлик баҳсларида иштирок этади. Истомин/Карловский жуфтлиги ўз юришини бугун 16:00да икки португал — Жейми Фария (АTP рейтингида 616)/Дуарте Вале (566)га қарши бошлайди.