Истомин фаолиятини якунлаяптими?

У 2-3 февраль кунлари "Дэвис кубоги" доирасида Ўзбекистон терма жамоасини Польшага қарши ўйинда сардор сифатида бошқаради.

Теннисчи мазкур ўйинлар олдидан ўз фикрлари билан ўртоқлашди.

- Учрашув олдидан фикрларингиз қандай? Польша таркиби ва ўйинчилар ҳолати?

"Ҳа, Польша жуда жиддий жамоа. Улардаги биринчи рақамли теннсчи дунё рейтингида топ-10да туради. Биз учун жуда қийин ўйин. Лекин биз ўз йигитларимизга ва кучимизга ишонамиз. Ва айтишганидек: "ўз уйингда деворлар ҳам ёрдам беради". Ғалаба қозониш учун қўлимиздан келган барча ишни қиламиз".

- Жамоанинг сўнгги ўйинларида сардор сифатида бошлаб чиқдингиз. Бу сафар ҳам капитан ролидамисиз?

"Бу ҳозирча сир бўлиб қолади".

- Ўз фаолиятингиз ҳақида нима дея оласиз? Бўлажак турнирлар ҳақида

"Йўқ, мен ҳали расман бўлмаса-да, фаолиятимни якунладим. "Дэвис кубоги"да ҳам ўйнасам, бу менинг сўнгги ўйинларим бўлади".

- Ўзбекистон терма жамоаси таркиби ҳақида нима дея оласиз?

"Йигитлар тайёр. Сергей Фомин Туркияда ўзининг шахсий мураббийи билан шуғулланди. Мавсум олдидан 2,5 ой машғулот ўтказди. Ҳумоюн Германияда машғулот қилиб, кейин Қатарда иккита турнирда иштирок этди ва бирида чемпион, иккинчисида вице-чемпион бўлди. Уларнинг иккиси ҳам яхши формада. Бундан ташқари, икки ёш теннисчимиз ҳам (Шин, Милушев) Туркияда шуғулланди. Ҳамма формада ва ўйинга тайёр", - деди Истомин.