ITA кураш бўйича ўзбекистонлик Жаҳон чемпионини дисквалификация қилди

"Ўзбекистонлик Эркин Қозоқов 2024 йил 17 декабрь куни Тошкентда бўлиб ўтган Бутунжаҳон Профессионаллар Серияси (WSP) финал босқичида допинг назорати чоғида тақиқланган модда бўлган мелдоний аниқланган. Спортчи антидопинг қоидаси бузилганини тан олди ва ITA томонидан кўрилган чораларни қабул қилди. Натижада, унинг дисквалификация муддати аввалги тўрт йилдан уч йилга қисқартирилди.

Эркин Қозоқов 2025 йилнинг 30 январидан 2028 йилнинг 29 январигача барча расмий мусобақалардан четлаштирилди. Унинг 2024 йил 17 декабрдан буён барча натижалари ҳам дисквалификаcия қилинади.

Яна бир жаҳон чемпиони туркманистонлик Даянч Омировда метандиенон ва мелдоний метаболитлари аниқланган. Ушбу моддалар WADA 2025 рўйхатида қатъиян тақиқланган ва спортчиларда мушакларнинг массасини, кучини ва чидамлилигини сунъий равишда ошириш учун ишлатилади. 2025 йил 18 июн куни тўпланган мусобақадан ташқари намуна спортчининг антидопинг қоидаларини бузганлигини кўрсатди.

Даянч Омиров вақтинчалик четлатилди. У Б намунасини таҳлил қилишни талаб қилиш ҳуқуқига эга. Агар Б намунаси бир хил натижани берса, унинг иши якуний қоидабузарлик сифатида қайд этилади.

Маълумот учун: Эркин Қозоқов ва Даянч Омиров 2023 йили Ашхободда бўлиб ўтган кураш бўйича катталар ўртасидаги XIV жаҳон чемпионатида ўз вазн тоифасида ғолибликни қўлга киритган эди. Уларнинг ҳозирги допинг иши чемпионат натижаларига таъсир қилмайди", дейилади ташкилот хабарида.