Жаҳон чемпионати. Бу сафар Жавоҳирда мағлубият, Исломбекда ғалаба

8, 10 ҳамда 12 ёшли шахматчилар ўртасида ташкил этилаётган жаҳон чемпионатида дунёнинг 100га яқин мамлакатидан истеъдодли шахматчилар иштирок этяпти.

Саккиз ёшлилар ўртасидаги мусобақада ўз имкониятини синаб кўраётган Ҳумоюн Бекмуродов 8-турда грузиялик Александр Гаручавани мағлубиятга учратиб, очколарини 4тага етказиб олди.

Ўн ёшли шахматчилар баҳсида биринчи рақам остида таснифланган Исломбек Синдоров эса оқ доналарда ҳаракат қилиб, АҚШ вакили Лу МИнгни таслим этди.

Ўн икки ёшли шахматчилар мусобақасида иккинчи тартиб рақамли иштирокчи бўлиб турган Жавоҳир Синдоров эса аксинча мағлубиятга учради. У оқ доналарда ўйнашига қарамай, рейтингда ўзидан пастда турган россиялик Валерий Скатчковга имкониятни бой берди.

Қизларимиздан Афруза Ҳамдамова бу сафар дуранг ўйнади. У қора доналарда ўйнаб, рейтингда ўзидан анча юқорида турган россиялик Александра Шведовадан очко тортиб олди.

Ҳамюртларимиздан Юлия Хегай сербиялик Невена Жоржевич билан муроса йўлини танлади. Мафтуна Бобомуродова эса қора доналарда ҳаракат қилишига қарамай, эронлик Зардаст Маҳжубни енгди.