Жалолов билан жанг қилиши мумкинлиги айтилган Мурат Гассиев Тайсон Фьюрига қарши рингга чиқиши мумкин

Бу ҳақда промоутер Ивайло Гоцев маълум қилди.

"Мурат тайёр, унинг хоҳиши ҳам, имконияти ҳам бор, — дея Гоцевнинг сўзларини келтиради The Sun нашри. — Бу шунчаки ўрин алмашинув эмас, балки жанг мақомини чемпионлик даражасига кўтариш бўлади. Фьюри 20 ноябрь куни рингга чиқмоқчи. Мурат аллақачон жанг учун тайёргарлик кўрмоқда. Уларни учраштиринг, шунда Фьюри яна оғир вазнда жаҳон чемпиони бўлиш имкониятига эга бўлади. Нью-Йорк — [ушбу жанг учун] идеал жой. Фьюри халқаро аудиторияни, Мурат эса Шарқий Европанинг улкан аудиториясини жалб қилади. Услублар нуқтаи назаридан ҳам жанг қизиқарли кўринади: боксчи-ўйинчи Фьюри ва панчер (кучли зарба берувчи) Гассиев".

Эслатиб ўтамиз, Гоцев айтиб ўтган санада Фьюрининг бошқа бир собиқ жаҳон чемпиони Энтони Жошуа билан жанги режалаштирилган, бироқ промоутер Эдди Хирн томонидан илгари сурилган қўшимча талаблар туфайли музокаралар яқинда мураккаблашиб қолди. Юзага келган вазиятни изоҳлар экан, Фьюрининг вакили Тайсон ҳар қандай ҳолатда ҳам 20 ноябрь куни "Мэдисон Сквер Гарден"да рингга чиқишини, ҳатто бунинг учун бошқа рақиб излашга тўғри келса ҳам, ваъда берди.

Бир муддат аввал Гассиевнинг жамоаси эҳтимолий рақиблар орасида Баҳодир Жалолов ҳам борлигини айтганди.