Жамоа эгизак спортчиларнинг маҳорати эвазига кубок соҳиби бўлди ФОТОГАЛЕРЕЯ

Ўзбекистон мудофаасига кўмаклашувчи “Ватанпарвар” ташкилоти Хоразм вилояти кенгаши тасарруфидаги вилоят техник ва амалий спорт турлари марказининг жорий йилги тақвим режасига асосан ўтказилган мусобақада 16 та жамоанинг 33 нафар ёзги биатлон устаси белгиланган масофага югуриш ҳамда пневматик милтиқдан тик турган ва ётган ҳолда ўқ отиш машқини бажариш борасида ўз маҳоратини синовдан ўтказди.

Беллашувларда Қўшкўпир тумани ўқув спорт техника клуби жамоаси спортчилари юқори натижага эришишди. Бинобарин, жамоанинг эгизак спортчилари - Одамбой Раҳимов ўғил болалар ўртасида, Ҳавожон Раҳимова эса қизлар орасида шоҳсупанинг энг юқори поғонасига кўтарилди.

Шунингдек, қизлар биринчилигида Шовот тумани ўқув спорт техника клуби аъзолари Машҳура Эрнафасова иккинчи, Зуҳра Рўзимова учинчи ўрин соҳибасига айланишди. Ўғил болалар мусобақасида Қўшкўпир туманининг “Ўртаёп” ЎСТК жамоасидан Диёрбек Ражабов, Шовот туманидан Фозилжон Исмоиловлар совринли ўринларни эгаллашди.

Умумжамоа ҳисобида эгизак спортчилар кўрсатган натижалар эвазига Қўшкўпир тумани ЎСТК жамоаси ёзги биатлон бўйича 2019 йилги Хоразм вилояти кубогини қўлга киритди. “Ўртаёп” ЎСТК ҳамда Шовот тумани ЎСТК жамоалари мос равишда иккинчи ва учинчи ўриндан жой олди.

Мусобақанинг ёпилиш маросимида қатнашган вилоят техник ва амалий спорт турлари маркази директори А.Ибрагимов ғолиб ва совриндор спортчиларни қутлаб, келгуси мусобақаларда ҳам омад тилади. 

Эндиликда, хоразмлик энг моҳир ёш ёзги биатлончилар жорий йилнинг 18-21 сентябрь  кунлари Тошкент вилоятининг Чирчиқ шаҳрида ўтказиладиган республика мусобақасида ғолиблик учун баҳс юритишади.

Икром Худойберганов тайёрлади /Урганч/