Жаноб Ким Жонг Корея Республикаси Президенти эътирофига сазовор бўлди

Тақдирлаш маросими Корея Республикасининг Тошкентдаги элчихонасида бўлиб ўтди. Корея Республикасининг Ўзбекистондаги фавқулодда ва мухтор элчиси жаноб Ким Хи Санг томонидан ёрлиқнинг асл нусхаси кореялик кураш фидоийсига тантанали равишда топширилди.

Мақтов ёрлиғида жумладан шундай сўзлар бор: “Эркинлик ва демократиянинг асосий тартиби асосида тинч йўл билан бирлаштириш фаолияти орқали Корея ярим оролини эркин, тинч ва фаровон қилишга қўшган ҳиссангиз мақтовга сазовор! Президент Юн Сеок-Йол”.

Ким Жонг дунёда миллий спортимиз курашни ривожлантириш, ёш ва тажрибали ҳакамларни тайёрлаш бўйича кўплаб ишларни амалга оширган кураш мутахассиси ҳисобланади. У узоқ йиллар Корея Кураш ассоциацияси Президенти, Осиё-Океания Кураш конфедерацияси вице-президенти, Халқаро Кураш ассоциацияси Ҳакамлик қўмитаси раиси сифатида фаолият олиб борган.

Айни кунларда Халқаро Кураш институти эксперти, ЎзДЖТСУ фахрий профессори, ЎзДЖТСУ Миллий Кураш турлари назарияси ва услубияти кафедраси ўқитувчиси лавозимларида курашнинг илмий асослари, кураш ҳакамлиги назарияларини тадқиқ қилмоқда.

Унинг муаллифлигида кураш ҳакамлиги бўйича кўплаб ўқув ва услубий қўлланмалар, китоблар ҳамда видео дарсликлар тайёрланган.