“Жар”да Ўзбекистон чемпионлари аниқланади

Мусобақада мамлакатимизнинг барча вилоятлари, Тошкент шаҳри ва Қорақалпоғистон Республикасидан тўпланган 7 ёшдан 16 ёшгача бўлган қарийб 1 100 нафар ўғил-қиз ғолиблик учун рингга кўтарилади. Баҳслар ҳар бир ёшдаги иштирокчилар ўртасида жами 60та вазн тоифасида ташкил этилди.

Бугун мусобақанинг очилиш маросими ўтказилди.

Бу йилги мусобақада иштирокчилар сони ҳар қачонгидан кўп бўлди. Бу эса юртимизда кикбокс спорт турига бўлган қизиқиш тобора ортиб бораётганидан дарак беради. Уч кун давом этадиган мусобақаларда ўзини ижобий томондан кўрсатган умидли ёшлар эса келгусида мамлакатимиз ўсмирлар ва ёшлар терма жамоаларига жалб этилади. бу спортчиларимиз халқаро ареналарда ҳам ўз сўзларини айтишига ишонаман, деди Ўзбекистон кикбокс ассоциацияси раҳбари Ойбек Норматов.

Шуни таъкидлаш жоиз, бу йилги мусобақалар дунёга машҳур Ludus компанияси билан ҳамкорликда ташкил этилди. Янги технология кикбоксда спортчиларнинг зарбаси қанчалик кучли ва тез бажарилаётганини аниқлаб беради. Унинг ёрдамида спортчилар ўз маҳоратини янада ошириб боришлари мумкин.

Мусобақа ғолиблари 3 март куни аниқланади.