Жейк Пол Тони Фергюсонга "вызов" ташлади

Аммо бу жангнинг амалга ошиши бироз қийин. Боиси, "қария" Тонининг UFC билан амалда шартномаси бор. Агар америкалик Дана Уайт билан келиша олса, Жейк Пол билан бўладиган жанг унга умрининг охиригача етадиган гонорар келтиради. 

Жейк Пол ўзининг ММА қоидалари асосидаги PFL лигасидаги илк жангида айнан "Эл Кукуй"ни рақиб сифатида кўрмоқчи. 

"Мен UFC билан шартномасидан озод бўлган исталган яккакураш устасига қарши жанг қилишга тайёрман. PFL лигасида ММА қоидалари бўйича жанг қилишни истайман. Фақат менга тўғри рақиб керак. Нейт Диас 15 миллион долларлик таклифимни рад этди. Кўрамиз, энди UFC лигасидан ким ҳайдалар экан. Балки, Тони Фергюсондир? У жанг қилишни хоҳлаётганини айтганди. Мен унинг Пимблеттга шу тарзда ютқазиб, нафақага кетишини истамайман. Акс ҳолда бу ачинарли якун бўлади. Тони ажойиб йигит, биз эса унга ёмонлик тиламаймиз", - деди ютубер.

Маълумот учун, 40 ёшли Тони Фергюсон сўнгги жангини ўтган йилнинг декабрь ойида британиялик Пэдди Пимблеттга қарши ўтказиб, очколар ҳисобига кўра ютқазиб қўйганди. Америкалик 27 ёшли Жейк Пол эса куни кеча профессионал боксдаги тўққизинчи ғалабасини тантана қилди. У рингда UFC юлдузлари Бен Аскрен, Тайрон Вудли, Андерсон Сильва ва Нейт Диасни мағлубиятга учрата олган.