Жисмоний тарбия ва оммавий спортни янада ривожлантириш бўйича анжуман ўтказилди ФОТОРЕПОРТАЖ

Ўзбекистон Республикаси Жисмоний тарбия ва спорт вазирлиги, Ўзбекистон Давлат жисмоний тарбия ва спорт университети, Ўзбекистон Ёшлар иттифоқи Чирчиқ шаҳар кенгаши ҳамкорлигида“ Ўзбекистонда жисмоний тарбия ва оммавий спортни янада ривожлантириш истиқболлари” мавзусида республика илмий-амалий анжуманини ўтказилди. 

Тадбир Ўзбекистон Республикаси Президентининг 2017 йил 9 мартдаги “2020 йил Токио шаҳрида (Япония) бўлиб ўтадиган XXXII  ёзги олимпия ва XVI Паралимпия ўйинларига Ўзбекистон спортчиларини муносиб тайёрлаш тўғрисида”ги ПҚ-2821 қарори, 2017 йил 3 июндаги “Жисмоний тарбия ва оммавий спортни янада ривожлантириш чора-тадбирлари тўғрисида”ги ПҚ-3031 қарори, 2019 йил 8 октябрдаги ПФ-5847 Фармонига мувофиқ тасдиқланган “Ўзбекистон Республикаси олий таълим тизимини 2030 йилгача ривожлантириш Концепцияси”, жорий йилнинг 29 октябрь куни қабул қилинган Ўзбекистон Республикасининг “Илм-фан ва илмий фаолият тўғрисида”ги қонуни ижроси доирасида ташкил этилди.

Илмий-амалий анжуманнинг очилиш маросимидан сўнг 6 та шўъбада фикрлар алмашинуви давом эттирилди. Тадбирда соҳада кўзга кўринган олимлар билан бирга Беларусь давлат жисмоний тарбия университетининг “Психология” кафедраси мудири, педагогика фанлари доктори Владимир Геннадьевич Сивицкий, “Биохимия ва физиология” кафедраси мудири, биология фанлари доктори Ирина Николаевна Рубченя ҳамда россиялик олим Виктор Владимирович Шияннинг маърузалари, халқаро мутахассис сифатида иштироки анжуман нуфузини янада оширишга хизмат қилди.

Суратлар муаллифи - Алимурод Мамадаминов